คเหตพฺพานิ ฯ ตุลาย เอกงฺคํ คเหตพฺพํ ฯ ขคฺคสฺส เทฺว องฺคานิ คเหตพฺพานิ ฯ
มจฺฉสฺส เทฺว องฺคานิ คเหตพฺพานิ ฯ อิณคาหกสฺส เอกงฺคํ คเหตพฺพํ ฯ

อฏฺฐโม วิคฺโค ฯ

พฺยาธิกสฺส เทฺว องฺคานิ คเหตพฺพานิ ฯ มคฺคสฺส เทฺว องฺคานิ
คเหตพฺพานิ ฯ นทิยา เทฺว องฺคานิ คเหตพฺพานิ ฯ อุสฺสวสฺส เอกงฺคํ คเหตพฺพํ ฯ
ปตฺตสฺส ตีณงฺคานิ คเหตพฺพานิ ฯ สุงฺกาสายิกสฺส เอกงฺคํ คเหตพฺพํ ฯ โจรสฺส ตีณงฺคานิ
คเหตพฺพานิ ฯ สกุณคฺฆิยา เอกงฺคํ คเหตพฺพํ ฯ สุนขสฺส เอกงฺคํ คเหตพฺพํ ฯ
ติกิจฺฉกสฺส ตีณงฺคานิ คเหตพฺพานิ ฯ คพฺภินิยา เทฺว องฺคานิ คเหตพฺพานิ ฯ

นวโม วคฺโค ฯ

จามริยา เอกงฺคํ คเหตพฺพํ ฯ กิริยา เทฺว องฺคานิ คเหตพฺพานิ ฯ กโปติกสฺส
ตีณงฺคานิ คเหตพฺพานิ ฯ เอกนยนสฺส เทฺว องฺคานิ คเหตพฺพานิ ฯ กสกสฺส ตีณงฺคานิ
คเหตพฺพานิ ฯ ชมฺพุกสิงฺคาลิยา เอกงฺคํ คเหตพฺพํ ฯ ปงฺกวารสฺส เทฺว องฺคานิ
คเหตพฺพานิ ฯ ทพฺพิยา เอกงฺคํ คเหตพฺพํ ฯ อิณสาธกสฺส ตีณงฺคานิ คเหตพฺพานิ ฯ
อนุวิจินกสฺส เอกงฺคํ คเหตพฺพํ ฯ

ทสโม วคฺโค ฯ

สารถิสฺส เทฺว องฺคานิ คเหตพฺพานิ ฯ ตนฺตวายสฺส เอกงฺคํ คเหตพฺพํ ฯ
นตฺถยิกสฺส เอกงฺคํ คเหตพฺพํ ฯ โภชนกสฺส เทฺว องฺคานิ คเหตพฺพานิ ฯ อุนฺนวายสฺส
เอกงฺคํ คเหตพฺพํ ฯ นาวายิกสฺส เอกงฺคํ คเหตพฺพํ ฯ ภมรสฺส เทฺว องฺคานิ
คเหตพฺพานีติ ฯ

เอกาทสโม วคฺโค ฯ

มาติกํ นิฏฺฐิตํ ฯ
ภนฺเต นาคเสน โฆรสรสฺส คทฺรภสฺส เอกงฺคํ คเหตพฺพนฺติ ยํ วเทสิ กตมนฺตํ
เอกงฺคนฺติ ฯ ยถา มหาราช คทฺรโภ นาม สงฺการกูเฏปิ จตุกฺเกปิ สิงฺฆาฏเกปิ

คามทฺวาเรปิ ภุสราสิมฺหิปิ ยตฺถ กตฺถจิ สยติ น สยนพหุโล โหติ เอวเมว โข มหาราช
โยคินา โยคาวจเรน ติณสนฺถาเรปิ ปณฺณสนฺถาเรปิ กฏฺฐมญฺจเกปิ ฉมายํปิ ยตฺถ กตฺถจิ
จมฺมขณฺฑํ ปตฺถริตฺวา สยิตพฺพํ น สยนพหุเลน ภวิตพฺพํ ฯ อิทํ มหาราช โฆรสรสฺส
คทฺรภสฺส เอกงฺคํ คเหตพฺพํ ฯ ภาสิตํ เจตํ มหาราช ภควตา เทวาติเทเวน กลิงฺครูปธานา
ภิกฺขเว เอตรหิ ภิกฺขู วิหรนฺติ อปฺปมตฺตา อาตาปิโน ปธานสฺมินฺติ ฯ ภาสิตญฺเจตํ
มหาราช เถเรน สารีปุตฺเตน ธมฺมเสนาปตินาปิ
ปลฺลงฺเกน นิสินฺนสฺส ชณฺณุเกนาภิวสฺสติ
อลํ ผาสุวิหาราย ปหิตตฺถสฺส ภิกฺขุโนติ ฯ
ภนฺเต นาคเสน กุกฺกุฏสฺส ปญฺจงฺคานิ คเหตพฺพานีติ ยํ วเทสิ กตมานิ ตานิ
ปญฺจงฺคานีติ ฯ ยถา มหาราช กุกฺกุโฏ นาม สกาลสฺเสว ปฏิสลฺลียติ เอวเมว โข
มหาราช โยคินา โยคาวจเรน กาเลน สมเยเนว เจติยงฺคณํ สมฺมชฺชิตฺวา ปานียํ ปริโภชนียํ
อุปฏฺฐเปตฺวา อตฺตโน สรีรํ ปฏิชคฺคิตฺวา นหายิตฺวา เจติยํ วนฺทิตฺวา วุฑฺฒานํ ภิกฺขูนํ
ทสฺสนาย คนฺตฺวา กาเลน สมเยน สุญฺญาคารํ ปวิสิตพฺพํ ฯ อิทํ มหาราช กุกฺกุฏสฺส
ปฐมงฺคํ คเหตพฺพํ ฯ ปุน จ ปรํ มหาราช กุกฺกุโฏ กาลสฺเสว วุฏฺฐาติ เอวเมว โข
มหาราช โยคินา โยคาวจเรน กาเลน สมเยเนว วุฏฺฐหิตฺวา เจติยงฺคณํ สมฺมชฺชิตฺวา ปานียํ
ปริโภชนียํ อุปฏฺฐเปตฺวา อตฺตโน สรีรํ ปฏิชคฺคิตฺวา เจติยํ วนฺทิตฺวา ปุนเทว สุญฺญาคารํ
ปวิสิตพฺพํ ฯ อิทํ มหาราช กุกฺกุฏสฺส ทุติยงฺคํ คเหตพฺพํ ฯ ปุน จ ปรํ มหาราช
กุกฺกุโฏ ปฐวึ ขณิตฺวา อชฺโฌหริตพฺพํ อชฺโฌหรติ เอวเมว โข มหาราช โยคินา โยคาวจเรน
ปจฺจเวกฺขิตฺวา อชฺโฌหารํ อชฺโฌหริตพฺพํ เนวว ทวาย น มทาย น มณฺฑนาย น วิภูสนาย
ฯ เป ฯ ผาสุวิหาโร จาติ ฯ อิทํ มหาราช กุกฺกุฏสฺส ตติยงฺคํ คเหตพฺพํ ฯ ภาสิตํ
เจตํ มหาราช ภควตา เทวาติเทเวน
กนฺตาเร ปุตฺตมํสํว อกฺขสฺสพฺภญฺชนํ ยถา
เอวํ อาหริ อาหารํ ยาปนตฺถนฺน มุจฺฉิโตติ ฯ
ปุน จ ปรํ มหาราช กุกฺกุโฏ สจกฺขุโกปิ รตฺตึ อนิโธ วิย โหติ เอวเมว โข มหาราช
โยคินา โยคาวจเรน อนนฺเธเนว อนฺเธน วิย ภวิตพฺพํ อรญฺเญปิ โคจรคาเม ปิณฺฑาย
จรนฺเตนปิ รชนีเยสุ รูปสทฺทคนฺธรสโผฏฺฐพฺพธมฺเมสุ อนฺเธน พธิเรน มูเคน วิย ภวิตพฺพํ

น นิมิตฺตํ คเหตพฺพํ นานุพฺยญฺชนํ คเหตพฺพํ ฯ อิทํ มหาราช กุกฺกุฏสฺส จตุตฺถงฺคํ
คเหตพฺพํ ฯ ภาสิตํ เจตํ มหาราช เถเรน มหากจฺจายเนน
จกฺขุมสฺส ยถา อนฺโธ โสตวา พธิโร ยถา
ชิวฺหามสฺส พลวา ทุพฺพโลริว
อถ อตฺเถ สมุปปนฺเน สเยถ มตสายิกนฺติ ฯ
ปุน จ ปรํ มหาราช กุกฺกุโฏ เลฑฺฑุทณฺฑลคุฬมุคฺคเรนปิ ปหาเรนปิ ปริปาติยมาโน
สกํเยว เคหํ น วิชหติ เอวเมว โข มหาราช โยคินา โยคาวจเรน จีวรกมฺมํ กโรนฺเตนปิ
นวกมฺมํ กโรนฺเตนปิ อุทฺเทสนฺเตนปิ ปริปุจฺฉนฺเตนปิ โยนิโส มนสิกาโร น
วิชหิตพฺโพ ฯ สกํ โข ปเนตํ มหาราช โยคิโน เคหํ ยทิทํ โยนิโส มนสิกาโร ฯ
อิทํ มหาราช กุกฺกุฏสฺส ปญฺจมงฺคํ คเหตพฺพํ ฯ ภาสิตํ เจตํ มหาราช ภควตา
เทวาติเทเวน โก จ ภิกฺขเว ภิกฺขุโน โคจโร สโก เปตฺติโก วิสโย ยทิทํ จตฺตาโร
สติปฏฺฐานาติ ฯ ภาสิตญฺเจตํ มหาราช เถเรน สารีปุตฺเตน ธมฺมเสนาปตินาปิ
ยถา สมฺมโต กุกฺกุโฏ สกํ เคหํ น ชหติ
ภกฺขาภกฺขํ วิชานาติ อตฺตโน วุตฺติกปฺปนํ
ตเถว พุทฺธปุตฺเตน อปฺปมตฺเตน สาสนํ
กทาจิ น วิชหิตพฺพํ มนสิการํ วรุตฺตมนฺติ ฯ
ภนฺเต นาคเสน กลนฺทกสฺส เอกงฺคํ คเหตพฺพนฺติ ยํ วเทสิ กตมนฺตํ
เอกงฺคนฺติ ฯ ยถา มหาราช กลนฺทโก นาม ปฏิสตฺตุมฺหิ อุปสงฺกมนฺเต นงฺคุฏฺฐํ ปปฺโผเฏตฺวา
มหนฺตํ กตฺวา เตเนว นงฺคุฏฺเฐน ปฏิสตฺตุํ ปฏิพาหติ เอวเมว โข มหาราช โยคินา
โยคาวจเรน กิเลสสตฺตุมฺหิ อุปสงฺกมนฺเต สติปฏฺฐานนงฺคุฏิฐํ ปปฺโผเฏตฺวา มหนฺตํ กตฺวา
เตเนว จ สติปฏฺฐานนงฺคุฏฺเฐน สพฺพกิเลสา ปฏิพาหิตพฺพา ฯ อิทํ มหาราช กลนฺทกสฺส
เอกงฺคํ คเหตพฺพํ ฯ ภาสิตํ เจตํ มหาราช เถเรน จูฬปณฺฐเกน
ยทา กิเลเส อุปตนฺเต สามญฺญคุณธํสเน
สติปฏฺฐานนงฺคุฏฺเฐน หญฺญติ โส ปุนปฺปุนนฺติ ฯ
ภนฺเต นาคเสน ทีปินิยา เอกงฺคํ คเหตพฺพนฺติ ยํ วเทสิ กตมนฺตํ เอกงฺคํ
คเหตพฺพนฺติ ฯ ยถา มหาราช ทีปินี นาม สกึเยว คพฺภํ คณฺหาติ น ปุน ปุริสํ

อุเปติ เอวเมว โข มหาราช โยคินา โยคาวจเรน อายตึ ปฏิสนฺธึ อุปปตฺตึ คพฺภเสยฺยํ
จุตึ เภทํ ขยํ วินาสํ สํสารภยํ ทุคฺคตึ วิสมํ ปีฬิตํ ทิสฺวา ปุน ภเวสุ
นปฺปฏิสนฺธหิสฺสามีติ โยนิโส มนสิกาโร กรณีโย ฯ อิทํ โข มหาราช ทีปินิยา เอกงฺคํ
คเหตพฺพํ ฯ ภาสิตํ เจตํ มหาราช ภควตา สุตฺตนิปาเต ธนิยโคปาลสุตฺเต
อุสโภริว เฉตฺวา พนฺธนานิ
นาโค ปูติลตํว ทาลยิตฺวา
นาหํ ปุน อุเปสฺส คพฺภเสยฺยํ
อถ เจ ปตฺถยสี ปวสฺส เทวาติ ฯ
ภนฺเต นาคเสน ทีปิกสฺส เทฺว องฺคานิ คเหตพฺพานีติ ยํ วเทสิ กตมานิ
ตานิ เทฺว องฺคานีติ ฯ ยถา มหาราช ทีปิโก นาม อรญฺเญ ติณคหนํ วา วนคหนํ
วา ปพฺพตคหนํ วา นิสฺสาย นิลียิตฺวา มิคํ กณฺหาติ เอวเมว โข มหาราช โยคินา
โยคาวจเรน วิเวกํ เสวิตพฺพํ อรญฺญํ รุกฺขมูลํ ปพฺพตํ กนฺทรํ คิริคุหํ สุสานํ วนปฏฺฐํ
อพฺโภกาสํ ปลาสลปุญฺชํ อปฺปสทฺทํ อปฺปนิคฺโฆสํ วิชนวาตํ มนุสฺสราหเสยฺยกํ
ปฏิสลฺลานสารูปํ ฯ วิเวกํ เสวมาโน หิ มหาราช โยคี โยคาวจโร น จิรสฺเสว
ฉฬภิญฺญาสุ วสีภาวํ ปาปุณาติ ฯ อิทํ มหาราช ทีปิกสฺส ปฐมํ องฺคํ คเหตพฺพํ ฯ
ภาสิตํ เจตํ มหาราช มหาเถเรหิ ธมฺมสงฺคาหเกหิ
ยถาปิ ทีปิโก นาม นิลียิตฺสวา คณฺหตี มิเค
ตเถวายํ พุทฺธปุตฺโต ยุตฺตโยโค วิปสฺสโก
อรญฺญํ ปวิสิตฺวาน คณฺหาติ ผลมุตฺตมนฺติ ฯ
ปุน จ ปรํ มหาราช ทีปิโก ยํ กญฺจิ ปสุํ วธิตฺวา วามปสฺเสน ปติตํ
น ภกฺเขติ เ อวเมว โข มหาราช โยคินา โยคาวจเรน กุหนาย ลปนาย เนมิตฺติกตาน
นิปฺเปสิกตาย ลาเภน ลาภํ ชิคึสนตาย ทารุทาเนน วา เวฬุทาเนน วา ปตฺตทาเนน
วา ปุปฺผทาเนน วา ผลทาเนน วา มตฺติกทาเนน วา จุณฺณทาเนน วา สินานทาเนน
วา ทนฺตกฏฺฐทาเนน วา มุโขทกทาเนน วา ปาตุกมฺยตาย วา มุคฺคสุปฺปตาย วา
ปาริภฏฺยกตาย วา ชงฺฆเปสนิเยน วา เวชฺชกมฺเมน วา ทูตกมฺเมน วา ปหิณคมเนน
วา ปิณฺฑปฏิปิณฺเฑน วา ทานุปฺปทาเนน วา วตฺถุวิชฺชาย วา นกฺขตฺตวิชฺชาย วา

องฺควิชฺชาย วา อญฺญตรญฺญตเรน วา พุทฺธปฏิกุฏฺเฐน มิจฺฉาชีเวน นิปฺผาทิตํ โภชนํ
น ภุญฺชิตพฺพํ วาทปสฺเสน ปติตํ ปสุํ วิย ทีปิโก ฯ อิทํ มหาราช ทีปิกสฺส ทุติยงฺคํ
คเหตพฺพํ ฯ ภาสิตํ เจตํ มหาราช เถเรน สารีปุตฺเตน ธมฺมเสนาปตินาปิ
วิจีวิญฺญตฺติวิปฺผารา อุปฺปนฺนํ มธุปายสํ
สเจ ภุตฺโต ภเวยฺยาหํ สาชีโว ครหิโต มม
ยทิปิ เม อนฺตคุณํ นิกฺขมิตฺวา พหี จเร
เนว ภินฺเทยฺยมาชีวํ จชมาโนปิ ชีวิตนฺติ ฯ
ภาสิตํ เจตํ มหาราช เถเรน อุปเสเนน วงฺคนฺตปุตฺเตน
ยทิปิ เม อนฺตคุรํ นิกฺขมิตฺวา พหี จเร
เนว ภินฺเทยฺยมาชีวํ จเรยฺยาหํ อเนสนนฺติ ฯ
ภนฺเต นาคเสน กุมฺมสฺส ปญฺจงฺคานิ คเหตพฺพานีติ ยํ วเทสิ กตมานิ ตานิ
ปญฺจงฺคานีติ ฯ ยถา มหาราช กุมฺโม นาม อุทกจโร อุทเกเยว วาสํ กปฺเปติ เอวเมว
โข มหาราช โยคินา โยคาวจเรน สพฺพปาณภูตปุคฺคลานํ หิเตน ผริตพฺพํ อเวเรน
อพฺยาปชฺเฌน อขิเลน เมตฺตจิตฺเตน จ เมตฺตาภาวนาย ภาวยิตพฺพํ ฯ อิทํ มหาราช
กุมฺมสฺส ปฐมงฺคํ คเหตพฺพํ ฯ ปุน จ ปรํ มหาราช กุมฺโม อุทเก อุปิลาเปนฺโต สีสํ
อุกฺขิปติ โส ยํ กิญฺจิ ปสฺสติ ตตฺเถว นิมุชฺชติ ตาฬิหโมคาหติ มา เต มํ ปสฺเสยฺยุนฺติ
เอวเมว โข มหาราช โยคินา โยคาวจเรน กิเลเส อุปสงฺกนฺเต อารมฺมณสเร นิมุชฺชิตพฺพํ
คาฬฺหโมคาหิตพฺพํ มา มํ สพฺพกิเลสา ปสฺเสยฺยุนฺติ ฯ อิทํ มหาราช กุมฺมสฺส ทุติยงฺคํ
คเหตพฺพํ ฯ ปุน จ ปรํ มหาราช กุมฺโม อุทกโต นิกฺขมิตฺวา กายํ อุตฺตาเปติ
เอวเมว โข มหาราช โยคินา โยคาวจเรน นิสชฺชาฐานสยนจงฺกมโต มานสํ นีหริตฺวา
สมฺมปฺปธาเน มานสํ อุตฺตาเปตพฺพํ ฯ อิทํ มหาราช กุมฺมสฺส ตติยงฺคํ คเหตพฺพํ ฯ
ปุน จ ปรํ มหาราช กุมฺโม ปฐวึ ขณิตฺวา วิวิตฺเต วาสํ กปฺเปติ เอวเมว โข
มหาราช โยคินา โยคาวจเรน ลาภสกฺการสิโลกํ ปชหิตฺวา สุญฺญํ วิวิตฺตํ กานนํ วนปฏฺฐํ
ปพฺพตํ กนฺทรํ คิริคุหํ อปฺปสทฺทํ อปฺปนิคฺโฆสํ ปวิวิตฺตํ โอคาหิตฺวา วิวิตฺเตเยว วาสํ
อุปคนฺตพฺพํ ฯ อิทํ มหาราช กุมฺมสฺส จตุตฺถงฺคํ คเหตพฺพํ ฯ ภาสิตํ เจตํ มหาราช
เถเรน อุปเสเนน วงฺคนฺตปุตฺเตน

วิวิตฺตํ อปฺปนิคฺโฆสํ พาฬมิคนิเสวิตํ
เสเว เสนาสนํ ภิกฺขุ ปฏิสลฺลานการณาติ ฯ
ปุน จ ปรํ มหาราช กุมฺโม จาริกํ จรนฺโต ยทิ กิญฺจ ปสฺสติ วา สทฺทํ วา สุณาติ
โสณฺฑิปญฺมานิ องฺคานิ สเก กปาเล นิทหิตฺวา อปฺโปสุกฺโก ตุณฺหีภูโตว ติกฺฐติ
กายมนุรกฺขนฺโต เอวเมว โข มหาราช โยคินา โยคาวจเรน สพฺพตฺถ รชนีเยสุ รูป
สทฺทคนฺธรสโผฏฺพฺเพสุ อาปตนฺเตสุ ฉสุ ทฺวาเรสุ สํวรกวาฏํ อนุคฺฆาเฏตฺวา มานสํ
สโมทหิตฺวา สํวรํ กตฺวา กตฺวา สเตน สมฺปชาเนนปิ นิสีทิตพฺพํ สมณธมฺมํ รกฺขมาเนน ฯ
อิทํ มหาราช กุมฺมสฺส ปญฺจมงฺคํ คเหตพฺพํ ฯ ภาสิตํ เจตํ มหาราช ภควตา สํยุตฺตนิกาเย
กุมฺมูปเม สุตฺตนฺเต
กุมฺโมว องฺคานิ สเก กปาเล
สโมทหํ ภิกฺขุ มโนวิตกฺเก
อนิสฺสิโต อญฺญมเหฐยาโน
ปรินิพฺพุโต น อปวิเทยฺย กญฺจีติ ฯ
ภนฺเต นาคเสน วํสสฺส เอกงฺคํ คเหตพฺพนฺติ ยํ วเทสิ กตมนฺตํ
เอกงฺคนฺติ ฯ ยถา มหาราช วํโส นาม ยตฺถ วาโต ตตฺถ อนุโลมยติ นาญฺญตฺถมนุธาวติ
เอวเมว โข มหาราช โยคินา โยคาวจเรน ยํ พุทฺเธน ภควตา ภาสิตํ นวงฺคํ สตฺถุสาสนํ
ตํ อนุโลมยิตฺวา กปฺปิเย อนวชฺเช ฐตฺวา สมณธมฺมํเยว ปริเยสิตพฺพํ ฯ อิทํ มหาราช
วํสสฺส เอกงฺคํ คเหตพฺพํ ฯ ภาสิตํ เจตํ มหาราช เถรเน ราหุเลน
นวงฺคํ ชินวจนํ อนุโลมยิตฺวาน สพฺพทา
กปฺปิเย อนวชฺชสฺมึ ฐตฺวา วายมถุตฺตรินฺติ ฯ
ภนฺเต นาคเสน จาปสฺส เอกงฺคํ คเหตพฺพนฺติ ยํ วิเทสิ กตมนฺตํ เอกงฺคํ
คเหตพฺพนฺติ ฯ ยถา มหาราช จาโป สุตจฺฉิโต มิโต ยาวอคฺคมูลํ สมกํเยว อนุนมติ
น ปฏิตฺถมฺภติ เอวเมว โข มหาราช โยคินา โยคาวจเรน เถรนวมชฺฌิมสมเกสุ อนุนมิตพฺพํ
นปฺปฏิปฺผริตพฺพํ ฯ อิทํ มหาราช จาปสฺส เอกงฺคํ คเหตพฺพํ ฯ ภาสิตมฺเปตํ มหาราช
ภควตา เทวาติเทเวน วิธุรปุณฺณกชาตเก

จาโปวานุนเม ธีโร วํโสว อนุโลมยํ
ปฏิโลมํ น วตฺเตยฺย ส ราชวสตึ วเสติ ฯ
ภนฺเต นาคเสน วายสสฺส เทฺว องฺคานิ คเหตพฺพานีติ ยํ วเทสิ กตมานิ
ตานิ เทฺว องฺคานีติ ฯ ยถา มหาราช วายโส นาม อาสนงฺกิโต ปริสงฺกิโต ยตฺตปยตฺโต
จรติ เอวเมว โข มหาราช โยคินา โยคาวจเรน อาสงฺกิตปริสงฺกิเตน ยตฺตปยตฺเตน
อุปฏฺฐิตาย สติยา สํวุเตหิ อินฺทฺริเยหิ คุตฺตทฺวาเรหิ จริตพฺพํ ฯ อิทํ มหาราช วายสสฺส
ปฐมงฺคํ คเหตพฺพํ ฯ ปุน จ ปรํ มหาราช วายโส ยํ กิญฺจิ โภชนํ ทิสฺวา กุณปํ
วา อุจฺฉิฏฺฐํ วา สพฺเพ ญาติโย โฆเสตฺวา เตหิ สํวิภชิตฺวา ภุญฺชติ เอวเมว โข มหาราช
โยคินา โยคาวจเรน เย เต ลาภา ธมฺมิกา ธมฺมลทฺธา อนฺตมโส ปตฺตปริยาปนฺนมตฺตมฺปิ
ตถารูเปหิ ลาเภหิ อปฺปฏิวิภตฺตโภคินา ภวิตพฺพํ สีลวนฺเตหิ สพฺรหฺมจารีหิ สาธารณโภคินา
ภวิตพฺพํ ฯ อิทํ มหาราช วายสสฺส ทุติยงฺคํ คเหตพฺพํ ฯ ภสิตํ เจตํ มหาราช
เถเรน สารีปุตฺเตน ธมฺมเสนาปตินา
สเจ เม อุปนาเมนฺติ ยถาลทฺธํ ตปสฺสิโน
สพฺเพสํ วิภชิตฺวาน ตโต ภุญฺชามิ โภชนนฺติ ฯ
ภนฺเต นาคเสน มกฺกฏสฺส เทฺว องฺคานิ คเหตพฺพานีติ ยํ วเทสิ กตมานิ
ตานิ เทฺว องฺคานีติ ฯ ยถา มหาราช มกฺกโฏ นาม วาสํ อุปคจฺฉนฺโต ตถารูเป
โอกาเส มหติมหารุกฺเข ปวิวิตฺเต สพฺพตฺถกสาเข ภีรุตฺตาเณ วาสํ อุปคจฺฉติ เอวเมว
โข มหาราช โยคินา โยคาวจเรน ลชฺชึ เปสลํ สีลวนฺตํ กลฺยาณธมฺมํ พหุสฺสุตํ ธมฺมธรํ
ปิยํ คุรุํ ภาวนิยํ วตฺตารํ วจนกฺขมํ โอวาทกํ วิญฺญาปกํ สนฺทสฺสกํ สมาทปกํ สมุตฺเตชกํ
สมฺปหํสกํ พฺรหฺมจารินํ เอวรูปํ คุรุํ วา กลฺยาณมิตฺตํ อุปนิสฺสาย วิหริตพฺพํ ฯ อิทํ
มหาราช มกฺกฏสฺส ปฐมงฺคํ คเหตพฺพํ ฯ ปุน จ ปรํ มหาราช มกฺกโฏ รุกฺเขเยว
จรติ ติฏฺฐติ นิสีทติ ยทิ นิทฺทํ โอกฺกมติ ตตฺเถว รตฺตึ วาสํ อนุภวติ เอวเมว โข
มหาราช โยคินา โยคาวจเรน ปวนาภิมุเขน ภวิตพฺพํ ปวเนเยว ฐานํ จงฺกมนํ นิสชฺชํ
สยนํ นิทฺทํ โอกฺกมิตพฺพํ ตตฺเถว สติปฏฺฐานํ อนุภวิตพฺพํ ฯ อิทํ มหาราช มกฺกฏสฺส
ทุติยงฺคํ คเหตพฺพํ ฯ ภาสิตํ เจตํ มหาราช เถเรน สารีปุตฺเตน ธมฺมเสนาปตินา
จงฺกมนฺโตปิ ติฏฺฐนฺโต นิสชฺชสยเนน วา

ปวเน โสภเต ภิกฺขุ ปวนนฺตํ ว วณฺณิตนฺติ ฯ

โฆรสรวคฺโค ปฐโม ฯ

ตสฺสุทฺทานํ
โฆรสโร จ กุกฺกุโฏ กลนฺโท ทีปินี ทีปิโก
กุมฺโม วํโส จ จาโป จ วายโส อถ มกฺกโฏติ ฯ
ภนฺเต นาคเสน ลาวุลตาย เอกงฺคํ คเหตพฺพนฺติ ยํ วเทสิ กตมนฺตํ
เอกงฺคนฺติ ฯ ยถา มหาราช ลาวุลตา นาม ติเณ วา กฏฺเฐ วา ลตาย วา โสณฺฑิกาหิ
อาลมฺพิตฺวา ตสฺส อุปริ อฑฺฒติ เอวเมว โข มหาราช โยคินา โยคาวจเรน อรหตฺเต
อภิวพฺฒิตุกาเมน มนสา อารมฺมเณ อาลมฺพิตฺวา อรหตฺเต อภิวฑฺฒิตพฺพํ ฯ อิทํ โข
มหาราช ลาวุลตาย เอกงฺคํ คเหตพฺพํ ฯ ภาสิตํ เจตํ มหาราช เถเรน สารีปุตฺเตน
ธมฺมเสนาปตินา
ยถา ลาวุลตา นาม ติเณ กฏฺเฐ ลตาย วา
อาลมฺพิตฺวา โสณฺฑิกาหิ ตโต วฑฺฒติ รูหติ
ตเถว พุทฺธปุตฺเตน อรหตฺตผลกามินา
อารมฺมเณ อาลมฺพิตฺวา วพฺฒิตพฺพํ อเสขผลนฺติ ฯ
ภนฺเต นาคเสน ปทุมสฺส ตีณงฺคานิ คเหตพฺพานีติ ยํ วเทสิ กตมานิ ตานิ
ตีณิ องฺคานีติ ฯ ยถา มหาราช ปทุมํ นาม อุทเก ชาตํ อุทเก สํวฑฺฒํ อนุปลิตฺตํ
อุทเกน เอวเมว โข มหาราช โยคินา โยคาวจเรน กุลคณลาภยสสกฺการสมฺมานนาย
ปริโภคปจฺจเยสุ จ สพฺพกิเลเสสุ จ สพฺพตฺถ อนุปลิตฺเตน ภวิตพฺพํ ฯ อิทํ มหาราช
ปทุมสฺส ปฐมงฺคํ คเหตพฺพํ ฯ ปุน จ ปรํ มหาราช ปทุมํ อุทกา อจฺจุคฺคมฺม ติฏฺฐติ
เอวเมว โข มหาราช โยคินา โยคาวจเรน สพฺพํ โลกํ อภิภวิตฺวา อจฺจุคฺคมฺม โลกุตฺตเร
ธมฺเม วิหริตพฺพํ ฯ อิทํ มหาราช ปทุมสฺส ทุติยงฺคํ คเหตพฺพํ ฯ ปุน จ ปรํ
มหาราช ปทุมํ อปฺปมตฺตเกนปิ อนิเลน เอริตํ จลติ เอวเมว โข มหาราช โยคินา